Tupi, South Cotabato—Patay ang usa ka van driver human gipusil sa wala pa mailhing suspek sulod sa gimanehuan niining van alas 10:00 sa buntag sa may National Highway, Barangay Poblacion, Tupi South Cotabato.
Giila ni Police Major Verlin Pampolina, Hepe sa Tupi Municipal Police Station, ang biktima nga si Morsid Buletin, hamtong ang pangidaron, residente sa Brgy. Polonuling, Tupi, South Cotabato. Sumala pa ni Pampolina nga basi sa impormasyon nga ilang nakuha , gikan sa Polonuling ang biktima ug padulong sa direksyong bahin sa Koronadal aron lang unta mamalengke kauban ang iyang pasahero nga gituohang maoy tag-iya sa sakyanan. Matud pa sa opisyal nga posibleng gisundan sa nakamotorsiklong mga suspek ang biktima ug pag-abot sa lugar gilayon kining gipusil sa makadaghang higayon nga miresulta sa hinanaling kamatayon niini.
Dugang ni Pampolina nga daghan matud pa ang nakakita sa pagpusil sa biktima apan walay nakaila tungod kay nakasul-ob man kini ug mask kansa paspas nga misibat human sa gihimong krimen. Sa karon padayon pang gi-imbestigahan sa kapulisan ang panghitabo aron sayron kung unsa ang background sa biktima ingon man ang motibo sa krimen.
