General Santos City—Makig-alayon na karon ang Police Regional Headquarters 12 ngadto sa Misamis Oriental Police Office may kalabutan sa pagkasikop sa tulo ka mga tawo nga sakay sa usa ka Van nga nagdala og daghang mga armas og bala gikan sa Marawi City padulong sa General Santos City.
Kini ang gikumperma ni Police Regional Headquarters 12 Spokesperson Police Chief Inspector Aldrin Gonzales sa pakighinabi kaniya sa RMN Gensan.
Kahibaluan nga niadtong milabayng adlawng Martes sa buntag naintercep sa kapulisan sa usa ka checkpoint sa may Amoros, El Salvador City, sa Misamis Oriental ang van nga gimanihiuan sa usa ka Jerry Balabat, kauban ang asawa niini nga giilang si Amalia Balabat og usa ka Sergio Pangantihon nga parihong mga mulopyo sa Polomolok, South Cotabato.
Sa report nga nahagpat sa RMN Gensan nga gikan matud pa ang tulo ka mga suspek nga sakay sa Van sa Marawi City padulong sa General Santos City sa dihang pag abot sa checkpoint naharang sila og didto na nakit-an sa mga kapulisan ang daghang mga cartoon og mga saku sa sulod sa Hi Ace Van.
Sa dihang giberipika na sa mga pulis mibungad kanila ang mukabat sa “150 pieces of fired 7.62mm cartridges, 164 pieces of cal. 50 fired cartridges, six boxes containing 7.62mm live ammunition, 50 rounds of 60 cal. live ammunition, og unom ka M-203 grenade launcher ammunition.
Matud pa kang Police Chief Inspector Richard Catipay, deputy chief sa El Salvador Police Station nga subay sa mga nakita nilang mga markings sa mga box, ang mga bala og armas ang naggikan sa government arsenal nga nakabase sa Marawi City og nakatakdang pagadad-on sa General Santos City.
Samtang depensa ni Jerry Balabat, driver sa maong van, nga wala sila masayod nga mga armas og bala ang gipadala kanila gamit ang ilahang Van og igo lamang sila gibayaran sa kantidad nga P8,000 aron ibiyahe ang maong items gikan sa Marawi City padulong sa General Santos City.
Sa pagkakaron dipa makunikta sa kapulisan kung ang tulo ka mga dinakpang taga Polomolok South Cotabato ang koniktado sa mga teroristang grupo tungod nagpadayon pa ang imbestigasyon. (Emir Bariquit)
