South Cotabato—Usa patay samtang usa angol sa nahitabong aksidenti sa kadalanan sa may Barangay Rizal, Banga, South Cotabato niadtong nakalabayng adlaw.
Giila ang namatay nga si Jan Cedric Inocencio, 24, mekaniko ug residente sa Barangay Improgo Banga. Samtang ang angol giilang si Clarence Baldove, 14, estudyante ug residente sa Sitio Solomon, Barangay Rizal.
Subay sa imbistigasyon sa Traffic Management Unit sa Banga Municipal Police Station nasuta nga kusog ang pagpadagan sa motorsiklo ni Inocencio hangtod nga nawad-an kini ug control og nabanggaan niini ang Baldove nga nagbaktas lang kilid sa kalsada.
Human nga nabanggaan niini ang biktimang estudyante, mibangga sab kini sa laing tricycle hinungdan sa grabeng damage sa motorsiklo sa biktima ug pagkaangkon niini ug grabeng samad.
Paspas nga gidala sa ospital ang biktima apan gideklara kining dead on arrival, samtang luwas na sab sa kasamtangan ang estudyanteng iyang nabangaan. Sa karon nagpadayon ang gihimong imbistigasyon sa kapulisan kalabutan sa maong insidenti.
