Patay ang backrider samtang pilason ang driver sang motorsiklo matapos nabungguan sang ten-wheeler truck nga may karga nga balas kag bato.
Ginkilala ang napatay nga backrider nga si Rio Pomar, 18 anyos sang Barangay Purog, Pototan samtang ang driver sang motorsiklo isa ka 16 anyos nga ginkilala lang nga si Lloyd kag pumuluyo sang Barangay Cauayan, Pototan.
Ginpahayag ni PO3 Mark Parreño, imbestigador sang Pototan PNP nga natabu ang aksidente alas 4:10 sang hapon, Enero 24,2019 sa ginsang-an sang San Jose kag F. Parcon St., Pototan.
Suno kay Parreño nga halin sa Barangay Cauayan ang motorsiklo pakadto sa Barangay Purog apang pag-abot sa corner Parcon kag San Jose St., nalab-ot sang nagasunod nga truck nga ginamaneho ni Rodrigo dela Cruz sang Purisima, Manapla, Negros Occidental ang motorsiklo kabangdanan nga natumba ini.
Masuwerte nga nagtabog ang driver apang dimalas naman ang backrider nga si Pomar nga nalasak gid sang truck kag wasak gid ang ulo sini.
