General Santos City–Dead on arrival sa balay tambalanan ang usa ka Jason Angelo Barrientos, legal age ug residente sa Polomolok South Cotabato samtang angol ang 2 pa ka mga pasahero niini nga nailang sila Joven Patriarca ug Kerwin Tiangson nga nanimuyo sa Polomolok, South Cotabato human nga na-aksidente ang pick up nga Mitsubishi Estrada nga gisakyan sa mga nahisgutan alas 11:35 ang takna sa gabie sa national highway, Barangay Apopong ning syudad niadtong nakalabayng adlaw.
Sumala pa ni PO2 Maynard Mallo, ang Traffic Investigator sa Traffic Management Unit nga nagdagan matud pa ang nasangpit nga sakyanan gikan sa Polomolok padulong sa sentrong bahin sa syudad.
Pag abot sa lugar, misuway ug overtake si Barrientos sa sakyanan nga nag-una kaniya apan adunay nakasugat nga laing sakyanan sa pikas lane hinungdan nga mi-balik kini sa iyahang linya apan nawad-an kini ug kontrol sa iyahang sakyanan hinungdan nga nidiritso ug bangga sa punuan sa kahoy nga hinungdan sa pagsirko balintong sa ilang sakyanan.
Nalagpot sa gawas sa sakyanan ang duha ka pasahero niini hinungdan nga nakaangkon ug mga bun-og sa kalawasan samtang ang driver nga si Barientos ang naipit sulod sa sakyanan nga hinungdan sa iyang hinanaling kamatayon.
Dugang pagbutyag ni Mallo nga posibling kusog ang dagan sa sakyanan sa mga biktima. Sa karon nagpadayon ang gihimong imbistigasyon sa maong insidenti. (Dave Silagan)
