General Santos City—Paherong nakabsan ug kinabuhi ang mag-inahan human nga gibanggaan ug duha ka mga sakyanan ang gisakyan nilang tricycle sa Crossing Palkan, Polomolok, South Cotabato.
Giila ang namatay nga mag-inahan nga silang Jinkee Matanod, legal age og Duelo Paglangan, 4 anyos mga residenti sa barangay Koronadal proper sa maong lungsod. Samtang angol ang tricycle driver nga si Tonton Matanod og usa pa ka pasahero nga si Olivia Matanod.
Subay sa inisyal nga imbistigasyon sa Polomolok Municipal Police Station nasuta nga pauli na sa Koronadal proper ang tricycle sakay ang mga biktima, pag abot sa Crossing Palkan, sila nabangaan sa nagsunod nga van nga iyaha sa LGU Cotabato nga gimanihuan ni Spo1 Ritchie Villagracia, nga nakabase sa Cotabato City.
Tungod sa kusog nga pagbangga, nalagpot ang tricycle sa pikas nga lane mao nga nabanggaan usab sa nagdagan nga kotse nga miresulta sa pagkalagpot sa mga pasahero. Daling gidala sa ospital ang mag-inahan kansa nagrabihan sa insidenti apan gideklara silang dead on arrival.
Gikaingong kusog ang dagan sa van gumikan nag-convoy kini sa usa ka opisyal sa Cotabato City dihang nahitabo ang insidenti. Sa karon nagpadayon pa ang imbistigasyon kalabutan sa insidenti.
