General Santos City—padayon pang gipangita sa mga personahe sa Philippine Coastguard, Bureau of Fire Protection Glan, Glan PNP ug mga residenti sa Crossing Kalabanit, Glan, Sarangani Province ang Vendor nga si Ian Kier Ledesma, 26 anyos residenti sa samang lugar kansa gituohang naanod sa sapa human kining nahulog.
Alas 5:00 ang takna sa hapon kagahapong adlawa dihang nakit-an sa mga bata ang pagkahulog sa nasangpit ngadto sa sapa ug wala na mitunga.
Subay sa pahayag sa live-in partner sa nasangpit nga alas 2:00 sa hapon dihang sila nag-uban pa sa pagpamaligya ug kakanin.
Pila ka oras ang nakalabay, miuli matud pa ang nasangpit sa ilang balay tungod nakabati kini ug kakapoy, pagkahapon, namasol matud pa ang nasangpit sa Kalabanit river aron unta pangsud-an nila sa panihapon apan nakadawat nalang kini ug taho sa ilang mga silingan nga matud pa nahagbong ang biktima ngadto sa sapa ug naanod gumikan sa kusog nga bul-og sa tubig sa maong sapa.
Tungod niini nangayog tabang ang ginang ngadto sa Philippine Coast Guard nga nakabase sa Glan ingon man sa PNP ug BFP Glan aron nga marescue ang biktima apan wala gyud kini makit-an.
Bugtong tsenelas lang sa biktima ang nakit-an sa mga rescuers nga anaa daplin sa sapa. Samtang giangkon ni Juvelyn nga dunay patol ang iyang kapuyo diin siya duda nga giatake kini sa iyang balatian dihang kini nahagbong sa sapa.
