Nagapati ang beterano nga Journalist nga si Peter Jimenea nga gin-harass siya sang mga pulis nga nagserbe sa iya sang bench warrant kahapon sang aga (Mayo 31).
Suno kay Jimenea nga ginserbehan siya sang bench warrant sang duha ka pulis samtang nagapangape sa Lapaz Public Market kag gindala sa San Jose Police Station sa probinsya sang Antique kag gin-priso.
Ang nasambit nga bench warrant may kaangtanan sa libel case nga iya ginapangatubang matapos mapaslawan siya nga magtambung sa hearing sang Mayo 7.
Ginkatingala ni Jimenea nga ginserbehan siya sang bench warrant bangud nahisugtan sa ila pinakaulihi nga hearing nga i-reset sa June 4 ang masunod nga hearing sa baylo nga Mayo 7.
Ginpahayag ni Jimenea nga maathag nga harassment ang ginhimo sa iya sang mga pulis kon sa diin nagakuha ang mga ini sang instruction pinaagi sa tawag sa cellphone kon ano ang himuon sa iya.
Nakatigayon lamang nga makaguwa si Jimenea sa bulig sang iya abogado nga si Atty. Pete Melliza.
