Villafuerte on HIV-AIDS: Amping kanunay

Davao City – Segun ni Sangguniang Panglungsod (SP) Committee on Health chairperson Third District Councilor Joselle Villafuerte nga dili ‘alarming’ ang pagtungtong sa Davao Region sa ikapitong lugar sa tibuok Pilipinas nga adunay pinakadaghang bag-ong kaso sa makamatay nga balatian nga HIV-AIDS.

Katarongan ni Villafuerte nga daghan og testing centers dinhi sa dakbayan nga puwedeng kaduolan sa mga tawong nagduda sa kondisyon sa ilang panglawas ug kung magpositibo man sa HIV, adunay retro viral nga madapat gawas sa AIDS nga wala pay tambal nga na-imbento ang mga eksperto sa tibuok kalibutan.

Subay sa record sa HIV-AIDS and Registry of the Philippines sa Department of Health-Epidemiology Bureau niadtong August 2019 mikabat sa 1,228 ka tawo ang bag-ong na-test nga ‘HIV positive’ kun 17% nga pag-usbaw diin 4% ang natampo sa Davao Region kun ikapito nga puwesto sa kinatibuk-ang datos sa tibuok Pilipinas.


Sa datos nga gipagula sa DOH-Davao Disease Surveillance of HIV-AIDS gikan 1984 hangtud July 2019, dul-an 4,000 na ang nataptan sa balatian diin sa Davao City, natala ang dul-an 3,000 ka kaso sa tibuok rehiyon.

Gi-awhag ni Villafuerte ang mga Dabawenyo nga dili mahadlok sa pagpa-check-up sa ilang kaugalingon ilabi na niadtong adunay daghang partner sa pakighilawas aron sa ingon masanta dayon ang pagkuyanap sa virus sa tibuok lawas pinaagi sa pag-tomar og tambal.

Dugang pagdasig sa opisyal alang sa dunay lahi-lahi nga mga partners nga batasanon ang paggamit og contraceptives sama sa condom panahon nga maghimo sa lawasnong kalipay aron malikayan ug dili matakdan sa HIV-AIDS.

RadyoMaN Joel Viray

Facebook Comments