Davao City – Dili na kini ang panahon aron ipatuman sa gobyerno ang panawagan nga ipailawom sa voluntary drug test ang mga kandidato sa 2018 synchronized Barangay and SK elections.
Gibutyag ni Gabriela Partylist Representative Emmie De Jesus nga wala nay panahon aron himoon ang voluntary drug test alang sa tanang kandidato kay pila na lang ka adlaw, eleksyon na.
Kung seryoso lamang ang kagamhanan sa kampanya kontra droga unta sa wala pa ang election period gipursige na ang drug test sa tanang mga nanagan sa bugnong lugaynon.
Gipuna usab ni De Jesus ang kagamhanan tungod kay maayo lang kini mugukod sa gagmay’ng nalambigit apan sa dagkung mga sindikato sa droga wala gyod intawon magukod ug malutos hangtud karon.
Kawang lamang ang voluntary drug test sanglit kun tinud-anay pa lamang ang gobyerno sa pagsumpo sa droga unta gihimo na kini nga regular dili lang sa mga kandidato sa barangay apan sa tanang empleyado sa kagamhanan.
Dugang pa sa magbabalaud nga dili mapugos sa kagamhanan ang mga kandidato sa drug test tungod kay pagyatak kini sa tawhanong katungod kun pugson ang mga nahisgutan bisan og supak sa ilang kabubut-on sanglit walay balaud nga nagmandar niini kanila.
RadyoMaN Joel Viray
