Davao City – Mag-atubang og kasong extortion batok sa usa ka Ahmar Anthony Zequerra, 20-anyos, minyo, usa ka waiter, netibo nga taga-North Cotabato City ug kasamtangang nagpuyo sa NHA Bangkal, siyudad sa Davao.
Nadakpan pasado alas-6:00 sa hapon sa gilusad nga entrapment operation sa kapolisan sa San Pedro didto sa Roxas Avenue ning siyudad diin malamposong nakuha gikan sa suspect ang P2,000 nga boodle marked money.
Sumala pa una paman nasikop ang suspect, usa ka katabang sa panimalay nga si alyas Mers, 22-anyos, nagpuyo sa Sitio Mabuhay, Marilog District, ning siyudad ang mireklamo batok sa suspect nga iya matud pang boyfriend.
Alas-2:40 sa hapon nakadawat og tawag gikan sa suspect ug nidemand sa kantidad nga P2,000 sanglit kun dili muhatag sa maong kantidad iyang ipakalat ang ilang sex video.
Nasayran nga nakahatag na ang complainant og P5,000 niadtong Oktubre 9 didto sa may Roxas hinungdan nga nagpatabang na sa kapolisan gani daling gilusad ang entrapment opreration ug malampusong nasikop ang suspect.
Sa gihimong pakighinabi sa DXDC RMN Davao ngadto sa suspect, gikanayon niini nga iya matud pa nabuhat ang maong butang sa iyang hinigugma tungod sa kalisod ug alang sa iyang tulo ka anak nga gagmay pa samtang gipanghimakak niini ang maong akusasyon diin iya matud pa ilisan ang maong kantidad.
Karon adlawa pursegido nga mupasaka og kaso ang iyang hinigugma.
RadyoMaN Don Pulayao
