General Santos City—Wala misukol, kini karon ang gihingusgan sa pamilya sa tulo ka mga namatay nga target sa gihimong search warrant Operation sa Barangay New Pangasinan, Koronadal City kagahapong adlawa.
Sumala sa igsuon ni Erwin John Magbanua nga taga Megaland, Barangay Carpenter Hill, Koronadal City, nga dili makatarunganon ang gihimo sa kapulisan ngadto sa iyang manghod. Wala gyud nisukol si Magbanua gumikan wala man kini gigunitang pusil dihang gisulod sa kapulisan ang ilang panimalay.
Sama usab niini ang gisulti sa anak ni Barangay New Pangasinan former barangay Kagawad Jaime Sunga, kansa usa usab sa namatay sa maong operasyon. Sumala ni Alias Alma nga wala nay katakos nga musukol ang iyang amahan gumikan tiguwang na ang nahisgutan. Ila gyud matud pa nakit-an nga upat ka mga armalite ang nagtion sa ilang amahan dihang kini naglingkod mao nga imposibli nga makasukol pa ang nasangpit.
Samtang nagpagawas usab ug kalain ug buot si Analiza Navarro, asawa sa napatay nga si Reynaldo Navarro bahin sa nahitabo sa iyang bana. Sumala sa ginang nga iyang giangkon nga kanhi nang nalambigit sa iligal nga droga ang iyang bana apan nagbag-o na ang nahisgutan, gani nipailawom pa kini sa programa sa gobyerno nga gatabang sa mga drug dependent.
Tudo depensa usab ang kapulisan sa aligasyon sa mga kabanay sa tulo nga namatay. Sumala ni Police Supt. Aldren Gonzales, Tigpamaba sa Police Regional Office 12 nga lehitimo ang maong operasyon ug misukol gyud ang mga suspek.
