General Santos City–Gihingusgan og gipaklaro ni Sarangani Governor Steve Chiongbian Solon nga walay away sa relihiyon og sa rasa sa tao kundili sa pipila ra ka mga indibidwal nga buot usbon ang pagtulun-an sa simbahan alang sa ilang kaugalingong interes padulong sa terorismo.
Giawhag na lamang niini ang tanang purok og barangay officials hilabi na sa mga coastal area sa Sarangani Province nga maoy manguna sa pagpabalo kung adunay mga foreigner nga muabot sa ilang dapit gamit ang kadagatan aron masuta kung legal sila nga nisulod sa Pilipinas.
Niaging mga adlaw, nagpahigayon og high level conference ang mga nasyonal nga ahensya sa gobyerno sa pagpanguna sa DILG aron hisgutan ang bag-ong E-CLIP program alang sa mga myembro sa teroristang grupo nga gustong nang mu-surender sa gobyerno. May programa na alang kanila ang Duterte Administration kung mao man lang kini matud pa ang usa sa mga pamaagi nga makab-ot ang tinuod nga kalinaw sa nasud.
Una ng nakadayig si DILG Assistant Secretary Alexander Macario sa gipatuman nga istratehiya ni Governor Solon nga “whole of nation approach.” Buot pasabot, halos tanan nga tao og sektor sa Sarangani Province ang sinsiro nga nagtinabangay aron depensahan ang seguridad sa ilang mga palibot.
