Konsehales sa Butuan Dismayado sa Kalangay sa Kasulbaran sa Kamatayon ni Aga Bersabal.
Matud ni Konsehal Ehrnest John Sanchez, Chairman, Committee on Public Order & Safety, daghan og kakulangon sa proseso sa imbestigasyon sa kapulisan.
Nadismaya usab ang uban pa nga mitambong sa tigum sa komitiba nga mga City Councilors Cherry May Busa, Rema Burdeos, Derrick Plaza, John Gil Unay, Sr. ug Ferdinand Nalcot.
Gibutyag ni Konsehal Sanchez, usa usab ka Abogado, nga mahinungdanon kaayo ang responsibilidad sa mga imbestigador labi na sa case build-up ug pagpasaka sa kaso.
Nasayran nga wala pa gihapoy nakuhaan og affidavit ang amahan sa biktima taliwala nga adto pang Agosto 11, 2020 nakaplagan ang patayng lawas sa gipatay nga si Elvis “Aga” Bersabal, hingkud ang pangidarun, ulitawo, nagpuyo sa Brgy. San Vicente ning syudad.
Nagtuklod tuklod usab ang investigator sa Station 1 ug Station 3 sa PNP sa hurisdiksyon kung kinsa ang moimbestigar.
Sigun sa imbestigador sa Station 3, angayan nga ang Station 1 ang mag imbestigar kay sa ila una gika report ang krimen taliwala anaa kini sa ilang hurisdiksyon ang Brgy. Bonbon kung diin nakaplagan ang patayng lawas nga gibinaboy og hikut.
Samtang giangkon usab ni Col. Canelo Fuentes, Hepe sa BCPO, nga daghan og lapses ang iyang mga imbestigador.
Subay niini, mipasalig si Col. Fuentes nga iyang tutukan ang maong kaso ug agi’g unang lakang, iyang pailisdan ang mga imbestigador nga naghupot sa maong kaso.
Misaad usab ang NBI nga motabang sa kasulbaran.
Gihimo ang tigum sa komitiba pagpanguna ni Konsehal Sanchez niadtong Oct. 5, 2020 sa SP Session Hall, City Hall.
Gitambungan usab ang maong tigum sa amahan sa biktima, kadagkuan sa NBI, SOCO – Caraga, Brgy. Bonbon ug BCPO.
Subling managtagbo sa sunod duha ka semana ang mga hingtungdang kadagkuan arun tukion kung dunay kalamboan labut sa krimen.
Ang tigum basi sa Privilege Speech ni City Councilor Ferdinand Nalcot nga nanawagan sa hustisya para sa kamatayon ni Aga.
Usa ka adlaw ang nakalabay human sa tigum, nanawag ang imbestigador sa NBI sa opisina ni Konsehal Sanchez nga adunay bag-ong development alang sa kasulbaran sa maong krimen.
