Davao City- Walay nasikop ang kapulisan sa Rehiyon XI nga mga financers sa last two human sa kinse diyas nga gihatag nga target ni PNP Chief Director General Ronald ‘Bato’ dela Rosa ngadto sa kapulisan aron hingpit na nga maundang ang iligal nga sugal sa nasud.
Sa interview sa DXDC RMN Davao kang Police Regional Office (PRO XI) acting spokesperson Police Senior Inspector Catherine dela Rey, bisan nahuman na ang kinse diyas nga ultimatum nga gihatag ni PNP Chief dela rosa, padayon gihapon ang operasyon sa kampanya batok iligal nga sugal.
Dugang ni dela Rey, daghan ang nadakpan nga mga ushers sa last two sukad pa kaniadtong Enero kutob Agosto 6 ning tuiga, kapin 269 katao na ang nasikop ubos sa 207 ka operasyon batok sa nasangpit nga sugal apan gikataho nga wala gihapoy nitug-an kung kinsa ang ilang mga financers.
“Dili sila mustorya kung kinsa ilang financers, wala tay makuha nga ebidensya against them (financers), dili ta pwede mudakop og walay ebidensya” sigun ni Dela Rey.
Sa datos sa PRO XI, mokabat na sa ₱ 151, 712 nakumpiska sa iligal nga sugal, 494 katao ang nadakpan ubos sa 281 ka mga gilusad nga operasyon sa iligal nga sugal sama sa last two, mahjong, video karera, bingo, sabong, tong-its ug e-games.
Kasamang Renelyn Barbarona
