Walo ka mga gituohang combatants o fighters sa Dawlah Islamiya Lanao Group ang anaa karon sa mga kamot sa militar, human ang combat military operations niadtong nakalabay’ng adlaw sa Piagapo, Lanao del Sur.
Matud pa ni Brigadier General Romeo Brawner, commander sa 103rd Infantry Brigade, Philippine Army, una nilang naaresto ang tulo ka mga armadon dihang ilang gipabuthan og upat ka kanyon ang bukirang bahin sa Barangay Paridi, kadlawon niadtong Miyerkoles.
Lakip nga nakuha gikan sa tulo ang ilang mga armas ug mga bala.
Ang mga residente, matud pa, sa lugar ang nag-report ngadto sa militar kabahin sa presensiya sa mga bag-ong recruit sa Maute-ISIS nga nagtago sa ilang mga paryente.
Samtang laing lima ka mga lalaki usab ang gi-imbitahan sa mga sundalo aron ipailawom sa interview kung nganong naa sila sa dapit.
Gi-angkon ni Brawner nga maglisod sila nga mahurot og sikop ang mga miyembro sa teroristang grupo tungod kay mga paryente man halos ang namuyo sa lugar nga mas pili-on pa nilang tagoan ang mga armado kaysa isumbong sa mga utoridad.
