Malamposong nasikop sa mga sakop sa Philippine Drug Enforcement Agency o PDEA-X, ang walo ka mga gagamit sa ginadiling druga atol sa ilang gipahigayon nga buy bust operation sa Malaybalay City.
Bandang alas 12 ang takna sa kadlawon niadtong Agusto 18, dihang nagpahigayon sa buy bust operation ang PDEA-X, sa 1st Avenue Inn, Propia St., Malaybalay City, kung asa nasikop ang usa ka provincial nurse, nga naila sa ngalan nga si Geoff Agustus Silabay alyas “Popoy”, 44 anyos, kinsa ga maintain og drug den sa maong dapit.
Atol sa operasyon, nasikop usab silang 2Lt Arthur Rey Aranggo, 23 anyos, usa ka sakop Philippine Army, Lorenzo Victor Aldeguer, 22 anyos, usa ka negosyante, Roger Hernandez, 34 anyos, usa ka mag-uuma, Shinray Dumaguit, 33 anyos, usa ka seaman, ug mga estudyante nga silang Maria Lourdes Valencia ug Juliet Jane Cruspero, 21 anyos.
Nakumpiska atoll sa operasyon ang lima ka sachet nga adunay sulod sa shabu, nga adunay timbang nga 30 grams ug nagkantidad sa 135,000 pesos, usa ka itum nga isuzu mux nga adunay plate number nga ADO 8760, mga drug paraphernalia, ug 500 pesos nga buy bust money.
Samtang, bandang alas 4:40 ang takna sa kadlawon laing operasyon ang ilang gipahigayon nga mi-resulta sa pagkasikop sa usa ka Alinor Elias, nga taga Purok 5 Brgy. 9, Malaybalay city.
Napalit gikan sa iya ang usa ka gamayng sachet sa shabu, bugti ang 1,000 pesos nga buy bust money, ug usa ka cellphone.
Sa karon, detenado na ang mga suspect sa mini cell sa PDEA Region X.
