Walo ka mga tunnels nga iligal nga naga-operate ang ginpasarado sang Provincial Government sang South Cotabato sang Disyembre 27 sang nagligad nga tuig sa Brgy. Desawo sang T’boli.
Nahibaluan nga sa pihak sang mga gin-isyu nga mga notices, padayon sa gihapon ang iligal nga operasyon sang nasambit nga mga tunnel nga nagapatigayon pa sang onsite processing sang ores rason nga ginpasarado na ang mga ini sang mga otoridad.
Ang pagpasarado sang amo nga mga minahan ang base naman sa kamanduan ni Governor Reynaldo Tamayo Jr. sa pagpasanyog sa regulasyon sang small scale mining operations kag pag-crackdown sa mga iligal mining activities sa probinsya.
Ginpangunahan sang Mines and GeoSciences Division sang Provincial Environment Management Office (PEMO), DENR-MGB 12 kag sa bulig sang 27th IB Philippine Army kag DISSMAI Small Scale Mining Association ang pagpasarado sa mga ini.
Sa subong yara sa30 ka mga tunnels ang gindeklarar sang Provincial Mining Regulatory Board (PMRB) nga minahang bayan kag legal operators.
Sa pinakaulihi nga report, naglab-ot na sa P 36 million ang nakolekta nga quarry kag mining tax sang South Cotabato halin Enero tubtob Nobyembre 2019.
