Nasikop sa operatiba sa City Drug Enforcement Agency kon CDEU ang usa ka wanted person kagahapon sa mga alas 2:30 ang takna sa hapon. Kini tungod sa pagkalambigit ni-ini sa iligal nga druga diha sa Julio-Pacana St., sa Brgy. Puntod ning syudad sa Cagayan de Oro.
Naila ang suspetsado nga 22 anyos nga si Steve Cabudbud, ulitawo nga walay trabaho ug residenti sa Lapas 1, Brgy. Puntod ning syudad. Gikabutyag nga naa sa watchlist isip tigpayuhot sa iligal nga druga ang maong dinakpan sa maong lugar.
Nasikop ang maong suspek atol sa anti-illegal drug buy bust operation nga gilusad sa CDEU sa pagpangulo ni PCaptain Mike Dioren Cavan alayon na sa RMFB 10-TSC ubos ni PMajor Exyllo Alcantara ug sa PS5 ni PCaptain Felzar Louie Fernandez diha sa nasangpit nga dapit.
gikabutyag nga napalitan sa usa ka sachet sa gituhoang shabu ang suspek balor 500 pesos ug narekober gikan sa posisyon ni-ini ang laing usa ka sachet sa gituhoang shabu kung diin gibana-banang motimbang ang nakumpiskang mga kontrabando ngadto sa .20 grams nga dunay street market value nga halos 1,500 pesos. Lakip nga nakuha gikan kaniya ang 500 peso bill nga ginamit isip buy bust money.
Nasayran nga ang maong suspek dunay pending warrant of arrest tungod sa kasong robbery with violence or intimidation of persons nga gi-isyu ni Hon. Jeoffre Willkom Acebido, ang presiding judge sa branch 41 sa RTC 10th Judicial Region sa Cagayan de Oro City, Misamis Oriental nga pinetsahan niadtong Agosto 1, 2021 nga dunay piyansa nga 100,000 pesos.
Ang suspetsado karon temporaryong nakakustodiya sa Maharlika Detention Cell alang sa tukmang disposasyon.
Kasama mo sa CDEU, RadyoMaN Andy Coco, DXCC tatak RMN!
