General Santos City–Malampusong nahagbong sa kamot sa kapulisan ang wanted person nga dugay ng nagtago-tago sa ilang lugar tungod sa patong-patong nga kaso nga gi-atubang niini human nga gisilbi kaniya ang warrant of arrest sa ilang panimalay.
Giila sa kapulisan ang dinakpan nga si Saed Ben Amad Magigilid alias Jayben Akmad, hingkod ang pang-idaron, residente sa Purok 1, Brgy. Lapu, Polomolok South Cotabato.
Sumala pa ni Police Captain Rommel Hitalia Deputy Station Commander sa Polomolok MPS nga nasikop nila ang suspek sa hiniusang pwersa sa nagkadaiyang unit sa kapulisan sa probinsya sa South Cotabato human gisilbi ang tulo ka warrant of Arrest sa nahisgutan sa kasong carnapping dunay CC no.4231-15, murder CC no.4232-15 ug attempted murder dunay CC no.4233-15 nga giisyu sa sala ni Judge Oscar Noel.
Dugang asoy ni Hitalia nga ang maong wanted ang usa sa suspek nga gitudlo nga mi-ambush sa mga sakop sa Special Action Force sa Polomolok pipila na ka tuig ang nakalabay asa patay ang usa ka pulis niadtong higayona tungod usab sa operasyon sa pagsilbi sa mga search warrant sa lugar asa gikaingong nahilambigit usab sa mga nahitabong serye sa pagpamusil sa munisipyo sa Polomolok.
Sa karon balhog sa selda sa Polomolok PNP ang dinakpan samtang gipaabot na lamang sa kapulisan ang commitment order niini sa korte aron hingpit na kining mabalhin ngadto na sa South Cotabaro Provincial Jail.(RV)
