Labason, ZDN-Dakpan ang duha ka indibidwal human gironda sa kapulisan sa lungsod sa Labason didto sa Brgy. Lapatan.
Nasikop sila si Jose Bulay-og ug Prospero alyas Lactit Gahub, pulos residente sa nahisgutan nga barangay.
Nag atubang kini sila sa kasong paglapas sa Sec 5 sa R.A 10593 kun illegal nga pagputo sa punuan sa lubi.
Ang duha ka dinakpan gihatagan ug kahigayonan nga maka pyansa sa 36mil bugti sa ilang kagawasan.
Samtang nakaangkon ug garas sa kulamoy ang usa ka motorist human kini na punggit sa puthaw nga karga sa usa ka cargo van nga gimaneho ni Renald Elnar, taga San Isidro Sergio Osmeña.
Sa imbistigasyon sa kapulisan sa Piñan kini si Arnel Nungcay nagmaneho sa iyang motorsiklo nga scooter gikan sa lungsod sa Piñan padulong dinhi sa dakbayan sa Dipolog, paghidangat niini sa atbang sa Polanco Farm, aksidente kining nalabtikan sa puthaw nga karga sa cargo van samtang pasulod kini sa nahisgutan nga farm.
Ang biktima dali nga gitambalan samtang ang driver gikustudiya sa PNP Piñan, alang sa tukmang disposasyon.
