General Santos City–Malampusong nasikop sa otoridad ang usa ka most wanted person sa hiniusang puwersa sa mga personahe sa Polomolok Municipal Police Station sa pagpanguna ni Police Lieutenant Colonel Samuel Cadungon og mga personahe sa Regional Intelligence Unit 12 nga gipangunahan ni Police Lieutenant Colonel Christopher Bermudez pinaagi sa pagsilbi sa warrant of arrest .
Giila ang suspek nga si Ryle Felisilda, 37 anyos , minyo og nanimuyo sa Venus street, Sanchez Subdivision, Poblacion, Polomolok, South Cotabato.
Alas 9:00 ang takna sa buntag gisilbi sa otoridad ang warrant of arrest ngadto na sa suspek nga pinetsahan pa niadtong Disyembre 27, 2012 sa kasong murder nga dunay criminal case no.3343-12 nga giisyu ni Hon. Judge Eddie Rojas sa RTC Brnch 39 , Polomolok nga walay piyansang girekomenda ang korte.
Malampusong nasikop ang suspek sa brgy. Klinan 6 sa naasoyng munisipalidad.
Nasayran usab nga ang suspek gikonsiderang top 2 most wanted person sa municipal level sa Polomolok.
Sa kasamtangan nagtingkagol sa selda sa PMPS ang dinakpan samtang gipaabot na lamang sa kapulisan ang commitment order gikan sa korte aron hingpit ng mabalhin sa provincial jail sa Koronadal City ang suspetsado. (Reynald Timario)
