Davao City – Nanganti ang Department of Interior and Local Government (DILG-XI) Davao Region nga ilang pasakaan og kasong kriminal ang mga kandidato nga masakpang magbayad og ‘permit to campaign’ ingon man ‘permit to win’ ngadto sa CPP-NPA-NDFP aron makapangampanya sa mga lugar nga infiltrated sa kalihukan.
Sumala ni DILG-XI Regional Director Alex Roldan nga ang pagbayad og ‘permit to campaign’ ngadto sa giilang kaaway sa estado nga mao ang mga komunista makunsidera kini nga pagtraydor sa nasud ug sa katawhan busa dapat lang silotan sa balaud ang mga kandidato nga maghimo sa ingon.
Walay angayang kahadlokan ang mga kandidato sa pagpangampanya sa mga ‘red areas’ kung ang ilang tinguha mao ang pagpangalagad sa katawhan ug hayan mahatagan pa sila og kunsiderasyon sa mga rebelde, segun ni Roldan.
Gidasig sa director ang mga kandidato nga nakadawat og ‘extortion letter’ ug hulga sa kalihukan nga makigkoordinar gilayon ngadto sa kapulisan ug kasundalohan aron kahatagan sila og igong proteksiyon panahon mukatkat sila og bukid aron mangampanya.
Pikas bahin, wala gilimod sa kanhi magsisibya nga aduna sila’y gidudahan ug gipanid-an nga pipila ka kandidato nga gahatag og dakung kantidad ngadto sa rebel front aron gawasnon kini makakampanya sa mga ‘rebel-infiltrated areas.’
Apan gidugang ni Roldan nga nalisdan sila sa paglutos sa wala nganli nga mga kandidato tungod sa kakulang sa mga ebidensiya nga magduot kanila sa kaso sanglit ang korte dili mudawat kung istorya-istorya lang ang basihan sa pagsang-at og reklamo.
RadyoMaN Joel Viray
