Davao City- Sa mga trahedya nga nahitabo na ug posibleng mahitabo pa sa usa ka syudad o komunidad, ang lokal nga gamhanan ang pinakadakong manubagay niini ilabi na dinha sa kapakyas niini pagpatuman sa mga pertinenteng balaud.
Sa interbyu kang Interface Development Interventions (IDIS) executive director Chinkie Pelino-Golle sa tulumanong ‘Straight to the Point’, huyang ug haguka nga pagpatuman sa tanang environmental laws dili lang denhe sa dakbayan sa Davao apan sa tibuok Pilipinas ang pinakarason sa managkalaing trahedya karon sama sa nahitabo nga landslide kun pagdahili sa yuta sa Shrine Hills, Diversion Road ning syudad.
Sumala ni Golle, kaniadto pang tuig 2013 aduna nay pagtuon ang Mines and Geosciences Bureau (MGB) sa Department of Environment and Natural Resources (DENR) kalabot niana diin nakita nga 222 ektariyas sa luna sa may taas nga bahin sa Shrine Hills ang bulnerable sa pagkankan sa yuta kun ‘prone to landslides’ gani aduna nasiplatan nga mga liki ug sinkholes sa susamang dapit.
Dugang sa hepe sa Davao environmental watchdog organization nga angay susihon nganong adunay mga higayon diin ang usaka proyektong pangkalamboan sama sa DPWH road widening sa Diversion area makabaton man sa gitawag nga Certificate of Non-Coverage bisan kun arang kadelikado ang estado sa lugar nga gihimoan sa maong mga aktibidad.
Gipanghinaut sa IDIS chief nga lingkuran sa lokal nga gobyerno ang maong suliran ug nga batonan ang mas klarong koordinasyon tali sa lokal ug sa nasyonal nga mga ahensya aron mas mapalig-on pa ug maayo ang mga talamdan alang sa hamugaway nga kinaiyahan.
RadyoMan Jason Amisola
