South Cotabato – anaa sa kritikal nga kondisyon ang usa ka lalaki human gipusil sa usa ka pulis nga nakabase sa Polomolok Municipal Police Station , niadtong Sabado, October 14 sa may Purok Mabuhay, Barangay Silway 8, Polomolok, South Cotabato.
Giila ang biktima nga si Ernesto Dalmacio Monteron, 26, welder ug residente sa Purok 2, Barangay Silway 8, sa nasangpit nga lungsod. Samtang giila ang suspek nga si PO2 Dennes Carmelotes, nakabase sa Polomolok PNP ug residenti sa Purok Mabuhay.
Sumala sa uyuan sa biktima nga si Alias Jojo, ayha nahitabo ang pagpamusil anaa ang biktima sa lugar tungod duna kini gitrabaho nga balay. Niadtong tungura mupalit lang unta ug sigarilyo ang biktima sa usa ka tindahan duol sa balay sa pulis.
Samtang nagbaktas ang biktima, giduol kini sa pulis dayon gipangutana kung unsay iyang gihimo sa maong lugar. Apan nibudlot nag pusil ang suspek mao nga nataranta ang biktima mao nga kini midagan. Didto na kini gipusil sa suspek igo ang biktima sa iyang apapangig.
Human sa insidenti mitahan gilayon ang suspek sa Polomolok PNP samtang ang biktima, daling gidala sa pribadong balay tambalanan sa Polomolok.
Sa pag imbistiga sa Polomolok PNP gikaingong gidudahan sa suspek ang biktima nga dunay dautang tumong kaniya tungod nagtindog kini duol sa ilang balay ug nag sul-ob pa ug jacket ug kalo. Gikaingong adunay bahad sa iyang kinabuhi ang nasangpit nga pulis.
