Wiretapping, expanded detention gisupak

21

Davao City – Gikunsidera karon sa Kalipunan ng Damayang Mahihirap (Kadamay) nga produkto sa dinautang binuhatan ang gilaraw nga bag-ong balaud sa Pilipinas nga mao ang Expanded Human Security Act diin nahisukip ang legitimate wiretapping, longer detention hours for terror and crime suspects ug uban pa.

Gibutyag ni Kadamay Davao City Chapter Focal Person Toto Bolcan nga daw iya sa demonyo ang balaud nga naghatag og kagahum sa gobyerno nga monitoron ang mga terorista pinaagi sa linya sa komunikasyon.


Sumala ni Bolcan, kalapasan sa privacy ug sa tawhanong katungod ang pagsulod sa linya sa usa ka tawo tungod lamang kay gitahapan kini nga apil sa pundok nga mangsabwag og terorismo sa ato nga dapit.

Gisukmatan pa ni Bolcan ang paglagda sa gobyerno sa Declaration of International Human Rights apan ang mga namuno mismo ang numero unong ga bayolar sa tawhanong katungod sa iyang katawhan.

Gilab-as ni Bolcan ang pag-akusa ngadto sa CPP-NPA-NDFP nga maoy mi-masaker sa 14 ka mag-uuma sa Negros apan pakyas ang kagamhanan sa pagpalig-on sa akusasyon.

Dugang ni Bolcan, ang pagpalapad sa hurisdiksyon sa Wiretapping Law repleksyon lamang sa kamatuoran nga gisakop na ang tibuok Pilipinas sa martial law nga gipatuman sa isla sa Mindanao.

Gibati og kabalaka si Bolcan kinsa beterano na sa pakigbisog nga basin maabuso sa mga awtoridad ang enhanced security measure diin malagmit bisan kinsa na lang ang initan sa ilang crackdown.

Gipanghinaot na lamang ni Bolcan ang pagpatunga sa Diyos aron dili muulbo pag-usab ang kaguliyang sa Pilipinas gumikan lamang sa wiretapping law nga hugot giduso sa mga security ug defense officials sa kagamhanan alang sa mas kusganon nga kampanya kontra sa gitawag nga mga ‘enemies of the state.’

RadyoMaN Joel Viray

Facebook Comments

From Advertisers