Davao City – Mikalampag karon ang usa ka labor sector leader dinhi sa Davao City ngadto sa sa Department of Labor and Employment (DOLE) tungod sa kamandoan niini nga dili na tugtan makalangyaw sa ubang kanasuran ang mga Pinoy hilabi na ang mga skilled workers aron unta manarbaho.
Gisaway karon sa Focal Person sa Sentro ng mga Nagkakaisa at Progresibong Manggawa Labor Coalition nga si Michael Ybanez ang gibuhat sa DOLE kay daw nagpatuman kini og martial law sulod sa sektor sa mga trabahante diin pugson ang mga skilled workers nga denhe lamang sa nasud manarbaho ug dili sa abroad.
Mipalag ang Sentro sa lakang sa DOLE nga punggan ang mga Pinoy sama sa mga skilled workers nga makalarga sa ubang nasud aron manimpalad og manarbaho kinsa nangandoy nga maharuhay ang kahimtang sa ilang mga pamilya.
Sumala ni Ybanez nga gumikan sa kagamay sa sweldo ug kawalay klaro nga mga benepisyo, mapugos gayod ang mga Pinoy sa pagpangita og maayong medyos kun oportunidad sa gawas aron mahaw-as nila ang ilang mga pamilya gikan sa kalisdanan ug kapobrehon.
Nasayran nga hurot-hurot na ang skilled workers sa nasud gumikan sa paglarga sa mga Pinoy ngadto sa ubang nasud diin nagkulang na karon ang workforce partikular sa construction industry tungod sa wala’g tuo nga mga proyekto sa gobyerno ug mga investments sama sa ‘Build Build Build.’
Nahibaloan nga sa miaging mga buwan, gibaliran mismo ni Mayor Inday Sara Duterte-Carpio ang gitanyag nga dugang mga proyekto gikan sa nasudnong gobyerno tungod sa nasinati nga pagkulang sa mga trabahante sa dakbayan karon.
Busa, sugyot ni Ybanez ngadto sa DOLE nga aron dili mahutdan og trabahante ang Pilipinas, mas maayo nga makig-istorya sa mga unyon sa mga trabahante aron hangyoon sila nga dili na mangiyawat og trabaho abroad inay himoong prayoridad na lamang ang Pilipinas basta sigurohon lamang nga daku ang panuholan ug nindot ang ilang mga benepisyo.
RadyoMaN Joel Viray
