Davao City – Gikalipay sa usa ka online teacher ang pag-apruba sa ‘Work-From-Home’ Law diin pinaagi niini mas makagahin sumala pa siya og daghang oras sa iyang pamilya ug sa iyang mga mahal sa kinabuhi.
Kini ang reaksyon ni Hecell Jane Bitangga, 22-anyos, usa ka Home-Based Online English Teacher nga taga New Alegria, Compostela, ComVal Province human nga naaprubahan ni Pangulong Rodrigo Duterte ang Work From Home Law o Telecommuting Act partikular na sa mga pribadong sektor.
Matud pa ni Bitangga mamahimong ‘less hassle’ o mas sayon alang kaniya ang maong pamaagi tungod kay dili na siya magsayo og mata ug magdali-dali padulong sa opisina aron mo-trabaho tungod kay sa sulod sa balay lamang niya mahimo ang trabaho pinaagi sa computer.
Kahinumduman nga gilagdaan ni Pangulong Duterte ang Republic Act 11165 diin nagdasig ang maong balaod sa mga employer nga himuong option ang ‘work from home’ o pagtrabaho gawas sa opisina alang sa mga trabahante gamit ang telecommunication ug computer technology.
RadyoMaN Kirby Manzon
