General Santos City–Adunay gipakanaug nga schedule of duty ang PNP National Headquarters aron ipatuman sa kapulisan sa tibuok nasud dungan sa selebrasyon sa Pasko ug pagsugat sa bag-ong tuig. Apan gibutyag ni Police Col. Gilberto Tuzon, City Director sa Gensan City Police Office nga ayha nila mapatuman ang maong schedule, dapat adunay mapasakaan ug kaso o madakpan human ang sunod-sunod nga kaso sa pagpamusil sa Gensan.
Kung pakyas matud pa nga mahimo ang iyahang kondisyon, gihingusgan niini nga magsugod ang break sa kapulisan human ang pagsugat sa bag-ong tuig. Dugang pamahayag ni Col. Tuzon nga hagit niya sa mga presinto nga adunay kaso sa patay nga dapat may mapasakaan ug kaso o dili ba kaha madakpan ang mga suspek aron mahatagan ug higayon nga maka-uban ang ilahang pamilya sa Pasko ug bag-ong tuig.
Hugot man usab ang mando niya sa kapulisan nga dungan sa kapaskuhan ug bag-ong tuig, dapat ipatuman ang full alert status sa ilang mga area of responsibility. Kini aron makit-an sa publiko nga wala naga-relax ang kapulisan hilabina sa pasko ug bag-ong tuig. Samtang, ginatutukan na karon sa kapulisan sa dakbayan kung aduna pay mga nagalihukan nga gun for hire human ang sunod-sunod nga kaso sa pagpamusil milabay’ng mga semana. Sumala kang Col. Tuzon nga sa karon padayon ang ginahimo nilang imbestigasyon bahin niini ug gipaniguro nga mahatagan ug hustisya ang mga biktima.(LVR)
