Davao City – Gi-awhag karon ang mga nanarbahong ginikanan dinhi sa syudad sa Davao nga i-enroll ang ilang mga anak sa Child Minding Centers (CMCs) kun ugaling walay magbantay niini.
Kini ang gipamahayag ni CMC head Josephine Bangkil atol sa ekslusibong pakighinabi kaniya kinsa miingon nga prayoridad nila ang mga single parents.
“Atoang minding center is free of charge, i-provide lang nila ang personal needs sa bata sama sa diapers, gatas, tubig, merienda sa bata,” segun niini.
Gitataw ni Bangkil nga ang CMCs adunay nursing station alang sa 3 months old hangtod 2 anyos, toddler section alang sa 2 anyos hangtod 3 anyos samtang pre-school section alang sa 3 anyos pataas.
Dugang sa CMC head nga matag kwarto adunay mga personahe sama sa teacher, nurse, caregiver o midwife nga maong mubantay, mu-giya ug muatiman sa mga panginahanglonon sa mga bata bisan sa panahon sa tingtulog.
Ilawom sa Davao City Social Services and Development Office (CSSDO), mamahimong mu-enroll sa maong center pinaagi sa pag-comply sa mga pertinenteng dokumento sama sa Certificate of Employment (COE) alang sa mga ginikanan ug photocopy sa Birth Certificate lakip ang whole-body picture sa bata.
Gisugdan kaniadtong tuig 1998, aduna nay upat ka mga Child Minding Center dinhi sa syudad sa Davao: Una ang anaa sa Rizal Park alang sa mga trabahante sa gobyerno samtang tulo ka mga Community-based nga CMC sa mga lugar sa Magallanes, Calinan ug Brgy. 27-C.
Sa pagkakaron, adunay gidugang si Pres. Duterte nga 5-million worth nga CMC building alang sa mas dako, komportable ug mas daghan pang ma-akomodar nga mga bata.
RadyoMaN Jason Amisola
