Sarangani Province–Apil nga nibisita sa probinsya sa Sarangani intrada pa lang sa tuig, partikularminte sa bukirang bahin sa Barangay Maligang sakop sa lungsod sa Kiamba, ang mga taga-World Bank aron personal makita ang nagpadayon nga pagpatindog sa planta sa abaca gidumalahan sa United Maligang Farmers Multi-purpose Cooperative.
Ang pagpabarog sa maong planta sa abaca kalakip ang mga modernong makina, delivery trucks og uban pang kagamitan, ang nagkantidad kinig P35.7 Milyones ka pesos nga gipondohan sa PRDP kon Philippine Rural Development Program ubos sa superbisyon nila Agriculture Secretary Manny Piñol og Pangulong Rodrigo Duterte, sa pag-ayuda sa worldwide financial institution nga World Bank.
Sa bahin ni Ricardo Añora, ang general manager sa United Maligang Farmers Multi-purpose Cooperative, dili lang taga-Maligang matud ang maka-benipisyo sa maong proyekto kundili ang tanang mag-uuma sa abaca sa entiro Sarangani. Sa pagkakaron, natapos na pag-konstrak ang bodega kon warehouse sa abaca, samtang anaa na sa 40% ang paghuman sa processing plant.
Dili malimtan ni Añora nga ang unang naghatag kanilag stripping machine napulo (10) ka tuig na ang nakalabay atong tuig 2009 mao mismo si Governor Steve Chiongbian Solon bise gobernador pa kaniadto. Sementado na ang dalan sa Maligang bisan anaa sila sa kabukiran, sa tabang gihapon sa PRDP nga gipondohan kinig dul-an P50 Milyones ka pesos. Daghan pang proyekto matud pa ni Governor Solon ang nakasulod sa ilang lugar, sama sa SAAD upland rice and livestock program.
