Despues del 20 dia del soseso donde 16 maga detenido del Tetuan Police Station ya escapa, con el ultimo unu detenido quien ya esconde na Basilan ya puede ya recuji otravez ayer.
Este despues mismo si Sulayman Sali, junto consu tiyo quien un doctor el ya navega desde Basilan y ya rendi con el maga pulis aqui na ciudad.
Na entrevista del RMN-Zamboanga si Sali ya habla ya segue le con 15 otro maga detenido escapa desde na carcel del Tetuan Police Station despues ya puede sila curta con el balabag-tranca del celda usando ciera de iyero.
Cuando afuera ya sila del estacion, ya man cada-y-cualan ya sila corre donde el ya pasa na Sitio Buggok, Sta. Catalina hasta ya guinda le pantalan.
Asegun con Sali ya munta le lancha para na Lamitan, Basilan y ya esconde le na Candiis, Mohammad Ajul Municipality na Basilan.
Con el 15 otro maga detenido quien ya escapa junto con Sali, ya puede dayun aresta na differentes lugar na ciudad.
Ya pensa le rendi cai asegun masquin afuera le dolomismo lang siempre le preso nupuede anda donde le quierre y mas ya queda tormento su pasada despues el pulis ya dale reward P50,000 para el su aresto.
Ayer, junto consu tiyo ya navega si Sali desde Lamitan para aqui na ciudad donde ya anda encuntra conele el maga pulis y ya detene na Zamboanga City Police Office.
Si Sali ta enfrenta caso de droga despues el su aresto antede man semana santa na Mampang.
