Nagalab-ot na sa 23 ka mga establishemento dire sa rehiyon dose ang permanente na nga magsarado kag nagbuhin sang ila nga workforce base sa datos sang Department of Labor and Employment ukon DOLE 12 sang Hunyo 23 tungod apektado ang ila nga negosyo sang subong nga sitwasyon tuga sang coronavirus disease 2019 ukon COVID-19 pandemic.
Suno kay DOLE 12 Information Officer Christopher Gamboa yara naman sa 468 ka mga empleyado ang apektado sa pagsarado sang nasambit nga mga establishemento nga kadam-an ang sa retail , food services, education, financial/insurance kag sa agriculture.
Samtang ang mga establishemento naman sa rehiyon nga nagpatuman sang temporary closure ang naglab-ot sa 1,621 kag yara sa 19,120 ka mga empleyado ang apektado, apang pipila dire suno pa ang nagbukas naman.
Yara naman sa 445 kag mga establishemento ang nagpatuman sang flexible work arrangement kag 9,703 ka mga trabahante ang apektado.
Ginkumpirmar man ni Gamboa nga may-yara man sang interventions ukon programs ang DOLE sa mga apektado nga mga empleyado kapareho sang Tulong Panghanapbuhay sa Displaced ukon Disadvantaged Workers,Covid-19 Adjustment Measures Program,Social Amelioration Program kag Dole Integrated Livelihood Program.
Sa datos sang DOLE 12 yara na sa 15,617 ka mga empleyado ang nabuligan paagi sa TUPAD BKBK, sa TUPAD-post COVID intervention may 13,882 ang nakabenepisyo, sa COVID-19 Adjustment Measures Program ukon CAMP yara sa 9,177 ka mga empleyado sang 736 ka mga establishemento ang nakaavail, sa SAP nagalab-ot sa 858 ka mga sugar industry workers ang nahatagan kag 518 ka mga beneficiaries sa DOLE Integrated Livelihood Program.
Ginalauman naman sang ahensya suno kay Gamboa nga indi na madugangan ang mga establishemento nga permanente nga magsarado tungod sa epekto sang COVID-19 pandemic.
Lakip man sa nahatagan sang DOLE 12 sang ayuda sa idalom sang DOLE –AKAP ang 3,863 ka mga displaced OFW`s sa rehiyon kag 1,502 sa BARMM
