Davao City- Gihagit sa usa ka kanhing opisyal sa Youth Vote of the Philippines ang pamunuan sa Philippine National Police nga gukdon ug silotan ang mga pulis nga mipatay sa mga batan-on sa Caloocan City.
Gi-awhag ni former Youth Vote of the Philippines Convenor Richard Amazona si PNP Director General Ronald “Bato” Dela Rosa nga dad-on sa korte ang mga pulis sa Caloocan city sa ngalan sa hustisya sa mga batan-on nga gipatay nila.
Gibarugan ni Amazona nga mali ang gibuhat sa mga pulis nga ilang gipatay sila Kian Lloyd Delos Santos ug Carl Arnaiz bisan pa og drug courier sila ug tulisan tungod adunay korte nga pwede musilot kanila kung tino-od ang pasangil ngadto kanila.
Ang sunod-sunod nga pagpatay sa mga batan-on nga hinimuan matud pa sa Caloocan city ug sa sindikato nagpaalarma kang Amazona diin nabalaka pa kini nga basin naalaan lang ang mga biktima ug dili tinood nga nalambigit sila sa droga ug tulis apan pareho sila gipatay sa mga awtoridad.
Gibulgar ni Presidente Rodrigo Duterte nga gituyo og pagpatay sila Kian ug Carl aron madaot sa publiko ang kampanya kontra droga ug masabotahe ang kasamtangan nga kagamhanan.
Aron wala na’y pulis malambigit sa pagpatay sa mga insonte mao kini ang panahon aron rebyuhon ni Dela Rosa ang sistema ug pulisiya sa giyera kontra droga.
Sa mao nga pamaagi masiguro nga malimpyohan ang nasudnong kapulisan gikan sa mga eskalawag nga mga awtoridad, dugang ni Amazona.
Kasamang Joel Viray
