Davao City – Daku ang posibilidad nga ang hisgotanang politikanhon maoy ugat-hinungdan sa managkaluhang pagpamomba sa Jolo Sulu Mount Carmel Cathedral diin kapin baynte ang namatay apil na ang lima ka sundalo ug 117 ka manimbahay nasamdan ug nagrabehan niadtong adlaw’ng Domingo sa buntag.
Kini ang lantaw ni Public Safety and Security Command Center (PSCC) chief Benito De Leon atol sa interbyu kaniya diin siya nagkanayon nga wala siya’y laing nakita nga motibo aron mamomba ang Ajang-Ajang Group nga may koneksiyon sa Abu Sayyaf gawas sa politikanhong aspeto ug mao kini ang rason nganong ilang gituyo og target ang mga sibilyan sanglit buot nilang uyogon ang nasudnong kagamhanan.
Segun ni De Leon, usa sa iyang nakita nga grupo nga dunay tinguhang mudaog sa pakigbatok sa gobyerno mao ang ISIS diin ang tanan nga dili makig-abin kanila ilang pagapatyon ma-Kristiyano man o ma-Muslim.
Alang ni De Leon, ang dugoong panghitabo dili mapahid ngadto sa giyera sa relihiyon ug tinuohoan tali sa Muslim ug Kristiyano kun dili usa kini ka tataw nga terorismo sanglit walay gipili ang mga terorista kung kinsa ang ilang mabiktima sa pagpamomba.
Busa kumbinsido ang kanhi heneral nga dili mahulog sa bangi ug away-relihiyon ang natigayong twin bombings sa simbahan sa Jolo Sulu ug sa usaka mosque sa Zambonga City labaw nang dili usab mudeklara og ‘jihad’ kun ‘holy war’ kay lakip ang ilang mga kaliwatan mabiktima man unya sa terror attacks.
RadyoMaN Joel Viray
