Zamboanga del Sur nakatala og dugang upat ka kaso sa COVID-19, aktibong kaso sa probinsya 19 na

24

Pagadian City – Gihimo na karon ang contact tracing sa mga gika-uban ug gikahimamat sa upat ka mga pasyente nga bag-ong nadugang sa ihap sa mga nagpositibo sa Corona Virus Disease (Covid-19) sa probinsya sa Zamboanga del Sur.
Nadugang sa talaan sa Integrated Provincial Health Office kun IPHO ang 53-anyos nga pasyenteng babaye nga taga Purok 3, Poblacion, Mahayag nga usa ka Locally Stranded Individual kun LSI nga gikan sa Santa Cruz, Manila.
Nagpositibo usab sa kagaw ang lalaki nga 21 -anyos nga taga – Purok 1, San Jose, Mahayag nga bag-o lang nakauli gikan sa Mandue City, Cebu.
Nalakip sa listahan sa nagpositibo sa Covid-19 ang 26-anyos nga lalaki nga residente sa Purok Tuburan, Poblacion, Aurora, Zamboanga del Sur ug nakabyahe gikan sa Quezon City.
Nakatala og unang kaso sa Covid-19 sa lungsod sa Tigbao dihang nagpostibo ang 24 nga lalaki nga taga-Purok Cawasnon, Begong, Tigbao nga gikan sa Mapulang Lupa, Valenzuela.
Ang mga nagpositibo nakuhaan og swab niadtong petsa 30 sa Hunyo ug nigawas ang resulta kagahapon human ang makuti nga proseso didto sa Zamboanga City Medical Center.
Gumikan sa nadugang nga upat nisaka na ngadto sa 19 ang aktibong kaso sa Covid-19 sa tibuok probinsya sa Zamboanga del Sur.

Facebook Comments