Dipolog City-Sa pinakaunang higayon, nagdeklara ang Department of Health ug national dengue alert.
Kini matod pa ni Health Sec. Francisco Duque kalabot kini sa pagtaas sa ihap sa mga kaso sa dengue sa ubang rehiyon sa nasud.
Tumong niini aron mapataas ang kahibalo sa publiko kalabot sa dengue ug kun unsaon paglikay niini nga sakit.
Matod ni Duque, apil sa mga rehiyon nga milapas sa epedemic threshold ang MIMAROPA, Western ug Central Visayas ug Northern Mindanao.
Sa datos sa DOH, nag una sa listahan nga adunay pinakataas nga kaso sa dengue ang Western Visayas nga may 13,164, gisundan sa Calabarzon nga may 11, 474, Central Visayas nga may 9,199, SOCKSARGEN 9, 107 ug Northern Mindanao nga may 8 739.
Samtang, padayon ang pagmonitor sa DOH ngadto sa Ilocos Region, Cagayan Valley, Calabarzon, Bicol, Eastern Visayas, Zamboanga Peninsula, Davao, Bangsamoro Autonomous Region in Muslim Mindanao ug Cordillera Administrative Region.
Sa pinakaulahi nga datos sa DOH, moabot sa 456 ang ihap sa namatay tungod sa dengue karong tuiga.
Kalabot niini, gipataas sa DOH sa code blue alert ang sitwasyon sa mga nahisgutan nga lugar.
Padayon sab ang pahinumdom sa DOH sa 4s strategy kontra dengue o search and destroy sa mga itloganan sa lamok nga may dalang dengue, self protection sama sa paggamit ug insect repellent ug pagsuon sa tag-as nga sanina, seek early consultation o pagpakunsulta sa tambalanan sa unang sintomas palang niini, ug say yes to fogging kung may outbreak sa dengue sa lugar.
