Davao City – Dakung uyon ang mayoriya sa mga taga-Davao sa laraw sa liderato sa Camara Baja nga hubo-an sa iyang budget kun hatagan lamang ug ‘P1 a year budget’ ang Commission on Human Rights kun CHR.
Sa random survey sa programang ‘Straight to the Point’ sa DXDC 621 RMN Davao, ubay-ubay sa mga respondiyentes nangatarongan nga husto lamang ang gilaraw karon ni House Speaker Pantaleon Alvarez nga hukasan sa iyang badyet ang nasangpit nga kontrobersyal nga constitutional commission sanglit daw nahimo na man hinoon kining ‘mouthpiece’ kun tigpamaba sa mga kritiko sa gobyerno bisan kun ang naghatag sa funding niini mao man ang kagamhanan.
Gawas pa niana, nangatarongan ang mga tigpaminaw nga dayag kaayo ang gipakitang pagka one-sided sa CHR matag higayun nga paluyuhan niini ang mga detractors sa pamunuan ilabi na niadtong nag-akusar sa mga awtoridad nga nagpasiugda sa extra-judicial killings diha sa kampanya batok iligal nga drogas.
Hinoon, lahi ra ang gituhuan ni Prof. Ramon Casiple, executive director sa Institute for Political and Electoral Reforms (IPER): Dili masayon ang gilaraw nga ‘zero budget’ sanglit usa kini ka constitutional body kansang mandato naglakip sa pagdepensa sa ordinaryong publiko gikan sa pagpang-abuso sa mga anaa sa poder.
Apan otra cosa ang mga pagkwestion sa aktibidad sa pipila ka mga partylist organizations pananglitan kadtong dayag nga kritikal kaayo kun hisgotan na gani ang mga kakulangon sa gobyerno.
Matud ni Casiple, klaro usab nga ang ubang partylist organizations gihimo lamang nga taming kun ‘convenient scapegoat’ sa mga daut nga pulitiko aron ma-‘circumvent’ nila ang maayong katuyuan ug kalagdaan sa partylist representation system ug haron gamiton kini nila silbing behikulo sa ilang kaugalingong hinakog ug bentahosong adyenda-pulitikal.
Kasamang June Duterte
