Pwedi maka-avail an mga parag-uma ha rehiyon otso hin zero-interest loan ha Department of Agriculture para han mga maaapektohan han rice tarification law.
Sumala kan DA VIII Regional Executive Director, Milo Delos Reyes, P15,000 an pwedi mautang han usa nga parag-uma ha gobyerno nga babayaran ha sakob han walo (8) ka tuig. Ine nga loan in para la ha mga nagtatag-iya hin usa (1) ka ektarya paubos nga umhanan.
Ugsa makatagamtam han loan, kinahanglan anay rehistrado an usa nga parag-uma ha municipal agricultural office kun diin hiya nag-uukoy.
Gin aaghat naman ni Delos Reyes an mga alkalde ha bug-os nga rehiyon, nga ig-lakip ha listahan an mga lihitimo nga mga parag-uma ha ira lugar. Ine nga listahan in ig susumiter han municipal agriculture office ha DA agud ma-validate ine. Tubtub nala ha September 30, 2019 an pag hulat han DA para han master list.
“I’m appealing na sana lahat ng ating mga local government units na isantabi muna ang political color, at yung mga maapektohan talaga ng rice tarification, i-endorse po sa amin ang mga pangalan na yan.“
Para naman han mga parag-uma nga nagtatag-iya hin sobra usa (1) ka ektarya hin umhanan, pwedi la gihapon hira maka-avail han seed assistance, mechanization program, ngan training ha TESDA ngan agricultural training institute (ATI).
Hapagkayana, waray pa nakikita nga dako nga pag-iba ha presyo han palay an DA ha eastern visayas mahitungod nga dire pa panahon han kat-ani. Nag papadayon naman an ira monitoring ngan pagpadangat hin weekly price report ha DA central office.
