Laing garbo ang naangkon karon sa Zamboanga del Norte human napili isip Presidente sa Association of Tourism Officers of the Philippines (ATOP)-Zamboanga Peninsula si Atty. Goldie Love Poculan-Gonzales, ang OIC sa Provincial Tourism Office sa Zamboanga del Norte.
Kini human gipahigayon ang online voting tali na sa tanang Tourism Officers sa rehiyon 9 nga gipasiugdahan sa Department of Tourism (DOT-9) kaniadtong Setyembre 25, atul sa pagsaulog sa Tourism Week niining tuiga.
Si Atty. Gonzales, sa iyang mensahe ang nagpasalamat sa tanang Tourism Officers sa Zamboanga Peninsula sa ilang pagsalig nga siya maoy mahimong presidente.
Dugang ni Atty. Gonzales nga atul sa iyang termino, iyang paningkamutan nga mamugna ang Constitution and By Laws sa maong asosasyon.
Makipagkoordinar usab sila sa nasudnong grupo sa ATOP alang sa dugang kalihukan nga makapalambo sa natad sa torismo dinhi
Giawhag lamang sa bag-ong Presidente sa ATOP nga “Stay at Home” una kay wala pa gitugot ang pagsuroy-suroy bisan asang dapit sa nasud taliwala sa giatubang karon nga krisis nga mao ang COVID-19.
Kanunay sundon ang health protocols aron malikayan ang pagkuyanap sa maong makamatay nga virus ilabi na nga adunay community transmission dinhi sa probinsya.
Sa pagkakaron, giawhag ni Atty. Gonzales ang publiko nga mobisita sa facebook page sa Provincial Tourism Office Zamboanga del Norte, aron makita ang nagkalain-laing destinasyon dinhi sa probinsya tungod kay kung matapos na ning pademya nga giatubang karon, aduna na unyay ideya kung hain makasuroy dinhi.
Ang napili nga Vice President sa ATOP Zamboanga Peninsula mao si Francis Duhaylungsod, ang Municipal Tourism Officer sa Lapuyan, Zamboanga del Sur, Secretary-Julie Ann La Fuentes sa lungsod sa Manukan ning lalawigan, Treasurer-Alito Bagaipo sa lungsod sa Roxas, ning lalawigan, Auditor- Taj Mahal Esmali sa lungsod sa Baliguian, ning lalawigan ug Press Relations Officer-Lennie Edillo sa lungsod sa Mahayag, Zamboanga del Sur. . * (PIC-mbmontederamos)*
