𝗡𝗔𝗔𝗔𝗚𝗡𝗔𝗦 𝗡𝗔 𝗕𝗔𝗡𝗚𝗞𝗔𝗬 𝗡𝗚 𝟮 𝗠𝗜𝗡𝗘𝗥𝗢, 𝗡𝗔𝗧𝗔𝗚𝗣𝗨𝗔𝗡 𝗦𝗔 𝗜𝗦𝗔𝗡𝗚 𝗧𝗨𝗡𝗡𝗘𝗟 𝗦𝗔 𝗕𝗘𝗡𝗚𝗨𝗘𝗧

Cauayan City — Natagpuan ang naaagnas na bangkay ng dalawang minero sa loob ng isang pribadong tunnel sa Camp 1000, Sitio Acupan, Barangay Virac, Itogon, Benguet noong ika-30 ng Disyembre, 2025.

Nadiskubre ang mga biktima matapos makaamoy ng mabahong amoy ang mga residente sa lugar at ini-report ito sa Itogon Municipal Police Station.

Kinilala naman ang mga nasawi na sina Ashford Jade Gayong Balic-o, 18, at Benjie Gulod Ayang-ang, 33. Ayon sa ina ni Balic-o, umalis ang dalawa noong ika-26 ng Disyembre upang magtrabaho sa minahan ngunit hindi na nakauwi.

Batay sa paunang imbestigasyon, walang nakitang palatandaan ng pananakit o pakikipaglaban sa mga bangkay, kaya’t pinaniniwalaang posibleng nalason ng gas ang mga biktima. Wala ring indikasyon ng foul play, at handa umanong pumirma ang mga magulang ng affidavit upang hindi na isailalim sa autopsy ang mga labi.

Patuloy pa rin ang imbestigasyon ng mga awtoridad.

Muling binibigyang-diin ng insidenteng ito ang panganib na kinahaharap ng mga small-scale at underground miner, lalo na dahil sa kakulangan sa bentilasyon at mga hakbang sa kaligtasan. Naalala rin ang mga naunang insidente sa Itogon, kabilang ang mga minero na natabunan ng landslide noong Hunyo at Nobyembre 2025.

Samantala, bagama’t wala pang opisyal na tala, posibleng isa si Balic-o sa pinakabatang minerong nasawi sa rehiyon sa edad na 18, na muling nagbubukas ng usapin hinggil sa child labor at kahirapan sa mga komunidad na umaasa sa pagmimina bilang kabuhayan.

SOURCE. GURU PRESS CORDILLERA

————————————–