SAGAY CITY – Masobra sa 1.5 ka tonelada sang ginatawag “tridacna gigas” ukon giant clams ang narecover sa sunod sunod nga pag-serbe sang search warrant sa 3 ka mga suspek sa Brgy. Molocaboc, Sagay City mga las 11:40 kahapon sang aga.
Nakilala ang mga suspek nga amo sanday Lito Canete, Felix Causapin kag Adam Atabella, tanan legal ang edad kag pumuluyo sang Purok Baquitan, Brgy. Molocaboc, Sagay City.
Suno sa Sagay City Police Station, gindakup ang 3 ka mga suspek bangud man sang illegal nila nga paghupot sang mga giant clams ukon kilala man bilang “Manlot shells” angut sa Republic Act 10654 ukon Anti Fisheries Code.
Ang pagserbe sang search warrant ginpatigayon sang Sagay CPS sa pagpanguna sang hepe sini nga si Police Major Antonio Benitez Jr. upod ang Task Force Lawod, BFAR 6 kag DENR kon diin kapin sa 127 ka bilog nga giant clams ang na-recover sa mga suspek./ Sagay City PNP photo
