Usa ka sundalo ang patay ug usa ang samdan human nahitabo ang engkwentro tali sa 3rd Special Forces Battalion ug New Peoples Army kon NPA Bukidnon kagabie.
Sa interview sa RMN Malaybalay ngadto kang Capt. Ryan LAyug, ang civil military operations officer ug spokesperson sa 403rd Brigade gibutyag niini nga nahitabo ang pagpangharass sa NPA sa detachment sa 1SF Battalion nga nahimutang sa Sitio Green Valley, Dalwangan ning siyudad alas 9:40 kagabie.
Matud ni Capt. Layug nga ang maong mga sundalo naghimo ug community support program sa mao nga dapit.
Dili pa usab mahinganlan ni Capt. Layug ang mga pangalan sa maong mga napatay ug nasamdan nga sundalo.
Dili pa usab makumpirma niini nga adunay mga armas ang nakuha ang NPA gikan sa mga sundalo.
Apan gibutyag sa opisyal nga adunay anti-personnel mine ang wala kabuto nga gibutang sa mga NPA sa kalsada nga target unta ang mga sundalo.
Sa karon padayon ang hot pursuit operation sa kasundaluhan sa mao nga dapit ug ilang gisusi kung aduna bay nasamdan o kaha napatay sa habig sa mga NPA.
Samtang gipahayag usab ninii nga adunay nahitabo nga enkwentro sa AFP ug NPA sa lungsod sa San Fernando kagahapon sa hapon apan gawas na kini sa ilang Area of Responsibility.
