Malipayong gipahibalo ni DTI representative Beth Monsanto Bolipata nga napirmhana na ang budget alang sa mga makinaryang ihatag sa provincial government sa Misamis Oriental.
Ang makinaryang nagbalor sa 1 million pesos maoy gamiton sa Oolong Tea processing Center sa barangay Kalagonoy, Gingoog City Misamis Oriental.
Gibutyag ni Bolipata nga lima ka tuig na ang milabay dihang nahatag kanila ang proposal sa maong budget apan karon pa kini naaprubahan ilabina nga duna nay plantang tukoron sa dakbayan sa Gingoog.
Kini ang pinaka-unang planta sa tsa nga makita dinhi sa Mindanao ug mapagarbuhong gianunsyo sa provincial government nga ang Oolong tea nag-inusarang makita sa siyudad sa Gingoog dinhi sa Pilipinas.
Pinaagi sa makinaryang gidonar sa DTI, mas mapadali ang proseso sa paghimos Oolong tea ug modako na ang kita sa mga mag-uuma dili lamang gikan sa Gingoog apan lakip na sa mga kasingbit nga lungsod.
