Tampakan, South Cotabato — Usa ang patay samtang usa ang angol sa nahitabong pagpamusil sa may Purok Sto. Nino, Barangay Poblacion, Tampakan, South Cotabato.
Giila ang namatay nga si Benjo Sapio, 20, residente sa Purok African Daisy, Barangay Poblacion samtang ang angol giilang si Vanjun Bilbao Yñiguez, 20, estudyante ug residenti sa Purok Ramos, Barangay Poblacion.
Sa imbestigasyon sa Tampakan PNP, nagbaktas ang duruha pauli sa ilang balay dihang sila gipamusil sa wala pa mailhing mga suspek.
Asoy sa mga nakakita sa krimen, usa ka Toyota Avanza kolor gray ang kalit matud pa nga mitapad sa mga biktima, gisita sa mga sakay niini ang mga nahisgutan tungod kay sila naa pa gawas sa ilang panimalay luyo sa gipatumang curfew sa ilang lugar.
Usa sa tulo ka mga sakay sa maong sakyanan ang kalit mibunlot ug pusil dayon gipamusil ang mga nasampit.
Gilayong misibat ang mga suspetsado samtang ang mga biktima gidala dayon sa ospital apan gibakwian gyud sa iyang kinabuhi Sapio human sa pipila ka oras nga pakigharong sa baba sa kamatayon.
Sa karon naglusad na ug makuting imbistigasyon ang Tampakan PNP bahin sa maong insidenti.
