Davao City – Nagpadayon karon ang imbestigasyon sa nahitabong disgrasya sa motorsiklo sa National Highway sa Upper Quinokol, Brgy. Inawayan, Sta. Cruz, Davao del Sur alas-4:40 kaganinang hapon, November 5, 2019.
Sa interbyu sa DXDC RMN Davao kang Police Staff Sergeant Jabbar Burahan, traffic investigator sa Sta. Cruz PNP, giila niini ang namatay nga biktima nga si Tristan Kurt Gomia, 16-anyos, residente sa Sitio Isong Barangay Inawayan, Sta. Cruz, Davao del Sur, ang driver sa motor diin angol usab ang duha ka sakay niini nga wala pa naila karong panahona nga gidala sa Southern Philippines Medical Center (SPMC).
Saysay usab ni Police Captain Mary Grace Martinez, officer in charge sa Sta. Cruz PNP nga nagparking ang usa ka nagub-an nga truck sa pass lane sa maong lugar sa dihang kalit na lamang nibangga ang motorskilo sa likod nga bahin sa sakyanan ug tungod sa kusog nga impact, namatay ang driver sa motor.
“Yung truck natin naka park sya sa pass lane kasi inaayos nya ‘yung tire. Anyway, meron naman syang nakalagay na early warning device. Then, itong motor hindi ata napansin, na bump siya sa likod ng truck,” saysay ni Martinez.
Sa pagkakaron, anaa sa kamot sa kapulisan ang driver sa truck samtang ginapaabot ang desisyon sa ginikanan sa namatay kung i-settle na lamang ang maong kaso.
RadyoMaN Kirby Manzon
