BACOLOD CITY – Nagresulta sa kamatayon sang pasahero sang traysikol, pagkasamad sang apat ka iban pa lakip man pagkadamage sang apat tanan ka mga salakyan ang natabo nga pagkabunggo sang isa ka tanker sa isa ka tricycle kahapon sang hapon sa Circumferential Road sa area sang Brgy. Alijis, Bacolod City.
Ini kasunod nga may mga las 12:50 kahapon sang udto, Setyembre 7 sa Circumferential Road, Bangga Metal, Brgy. Alijis ciudad sang Bacolod, ang tanker nga ginamaneho ni Francisco Bantad Jr., 41 anyos ang edad, soltero kag pumuluyo sang Brgy. Alegria, banwa sang Murcia ang nakabunggo sa isa ka tricycle matapos nadulaan sang kontrol ang driver.
Ang pilason nga ara sa tricycle amu sanday Jay Uguil, 39 anyos ang edad, kasado, driver samtang ang iya mga pasahero nakilala nga sanday Gia Anne Uguil, 5 yrs. old, Jhaymar Uguil, 9 anyos.
Patay naman si Gary Tabafa, 36 anyos ang edad, single tanan pumuluyo sang Purok Lemongrass, Brgy. Cabug, Bacolod City. Siya ang sanitary crew sang Omniworks Incorporated.
Base sa pagpangusisa sang Police Station 7, bangud sang impact sang pagkabunggo sang tanker sa tricycle, ini ang nakabunggo pa gid sa isa ka motor nga ginamaneho naman ni Gregie Paternal, 33 anyos ang edad, kasado sang Mt. Carmel, Alijis.
Kag bangud nga nagtiyog-tiyog ang motor, naigo man sini ang isa ka salakyan nga Honda Hatchback nga gina-drive naman ni Michael Ginete, 39 anyos ang edad, residente sang City Heights Subd., Brgy. Taculing, Bacolod City.
Bangud sang insidente, nasamaran ang driver sang motor nga si Paternal kag gindala sa Corazon Locsin Montelibano Memorial Regional Hospital, samtang nasamaran man ang driver sang tricycle ka gang iya mga pasahero kag gindala naman sa Bacolod Adventist Medical Center ukon BAMC.
Ang driver sang tanker ang padayon karon nga detained sa custodial facility sang Police Station 7.
Rasun sini nga wala nya nakontrol ang tanker bangod nadulaan ini sang preno. Nagapangayo man sya sang pasaylo sa mga nahul-an nga pamilya. /Screengrab from Michael Ginete dash cam footage
