General santos City—patay gyud ang usa ka 10-anyos nga batang lalaki human kini nga mahulog sa swing nga nahimutang sa playground sa ilang lugar sa may Sunshine Vill., Barangay Lagao human gilabyog sa iyang amigo niadtong Domingo, Oct. 22, 2017.
Giila ang biktima nga si Ryan Palma Jr., residente sa Sunshine Village Brgy. Lagao ning syudad. Subay sa pahayag ni Alberto Hucotan, apuhan sa biktima nga nidula ang iyang apo sa playground uban ang iyang amigo nga ginganlan ug Balong.
Gitabyog ug kusog ni Balong ang swing, nisinggit pa ang biktima nga tama na apan wala siya paminawa niini mao nga siya nahulog ug nabunal ang iyang ulo sa gahing butang.
Niuli sa ilang balay nga naghilak ang nasangpit, buntag pa dihang kini nadala sa ospital human nga dili na katindog ang biktima apan human sa pipila ka oras, nakabsan kini sa iyang kinabuhi.
Subay sa migawas sa Autopsy report sa lawas sa biktima nakitaan ug bali sa iyang likod sa iyang hawak damage sa iyang ulo ang biktima nga gituohang hinungdan sa kamatayon niini.
Walay planong mupasang-at ug kaso ang pamilya sa biktima ngadto sa minor de edad nga amigo sa nahisgutan apan ila nalang gihangyo nga tubagon ang pagpalubong sa 10 anyos nga bata.
