Davao City – Gipaniguro sa Department of Education (DepEd) nga dili maapektuhan ang pag eskwela sa mga kabataan human nga adunay napulo ka mga public school buildings sa syudad sa Davao ang dili una ipagamit human nga naapektuhan sa linog.
Sumala pa ni Jenielito “Dodong” Atillo, spokesperson sa DepEd-XI nga wala una gipagamit ang mga classroom sa maong mga tulunghaan tungod sa pagbaton niini’g mga ‘cracks’ diin nangita na lamang og laing pasilidad sulod sa eskwelahan aron makapadayon sa pagtuon ang apektadong mga estudyante.
“Wala nato gipagamit ang mga classrooms niining maong mga buildings and we look for other facilities within the school aron nga magpadayon lang gihapon nga magklase ang atong mga bata,” saysay ni Atillo.
Gi-rekomendang inspeksyonon og usab sa mga structural engineers ang maong mga gambalay human kini gideklarang dili na luwas gamiton sa Davao City Disasyer Risk Reduction and Management Office (CDRRMO).
Gibutyag usab ni Alfredo baluran ang hepe sa CDRMMO nga gawas maong mga eskwelahan, aduna usay upat ka opisina sa gobyerno ang dili na usab gamiton ug kinahanglan nga i-repair ug palig-onon.
RadyoMaN Kirby Manzon
