Davao City – Anaa na sa Temporary Treatment and Monitoring Facilities (TTMFs) ug naka-isolate na ang napulo (10) ka mga Overseas Filipino Workers (OFWs) nga miabot dinhi sa Davao City human nagpositibo sa Coronavirus Diease 2019 (COVID-19).
Matud ni Davao City Mayor Sara Duterte-Carpio (sa interbyu sa city-owned radio) nga sa napulo ka OFWs, pito (7) niini na-repatriate gikan sa Dubai, United Arab Emirates (UAE) ug tulo (3) gikan sa Dhaka, Bangladesh.
Ang nahisgutan kabahin sa 138 OFWs nga niabot sa Davao International Airport (DIA) sa managlahing flights niadtong July 15 ug July 18, 2021.
Gibutyag sa alkalde nga subay sa inpormasyon, pipila sa mga OFWs ‘asymptomatic’ kun wala nagpakita og simtomas sa virus. Adunay nagbaton og mild symptoms ug adunay nanginahanglan og medikal nga atensyon.
Sa pagkakaron, gitutokan na sa Department of Health (DOH-XI), ang pagpahigayon og contact tracing sa mga nahimamat o nakauban sa maong mga OFWs.
RadyoMaN Kirby Manzon
